Natura, hezkuntza eta kirola uztartuz jarduerak antolatzen jarraitzen du Zumardia elkarteak. Bada, maiatzerako gaztetxoei zuzendutako bi mendi irteera eskainiko ditu, «mendiaz ikasteko eta mendiaz gozatzeko».
Egun osoko mendi irteerak izango direla iragarri dute. Tolosatik abiatuta inguruetako mendi, baso eta txokoak ezagutzeko aukera izango da, eta 2011, 2012 eta 2013 urteetan jaiotakoek parte hartu ahalko dute.
Maiatzak 8an eta maiatzaren 29an izango dira irteerak. Goizean, 10:00etan elkartuko dira, eta itzulera arratsalderako, 17:00ak alderako izango dela azaldu dute.
Zumardia elkartetik esan dutenez, mendizaletasuna haur eta gazteenen artean zabaltzea lortu nahi dute horrelako ekimenekin. Horrekin batera, gazteek jarduera fisikoaz eta ingurumenaz gozatzea nahi dute; segurtasuna, ingurumena eta orientazioa bezalako edukiak ezagutarazi nahi dituzte; eta, mendizaletasunari lotuta dauden laguntasuna eta errespetua bezalako balio sozialak ere landu nahi dituzte.
Taldea osatzeko gutxienez sei pertsona beharko direla eta gehienez 12ko taldea osatuko dutela esan dute. Ibon Artola mendi kirol teknikaria eta mendi gidaria izango da gazteen irakaslea. Bazkideek 36 euro eta gainerakoek 40 euro ordaindu beharko dute parte hartzeko.