Tolosako zezen plazan aizkora apustu handia ikusi da gaur arratsaldean. 23 urte ondoren, Euskal Herriko lehen bi aizkolariren arteko desafioa jokatu da. Iker Vicente oinbikoetatik hasi da eta Mikel Larrañaga kanaerdikoetatik. Otsagabiakoa aurretik zijoala ematen zuen, baina lehen ilara amaitu arte erreferentzia guztiak balizkoak ziren. Eta hor, tartea horrenbestekoa ez zela ikusi da, Larrañaga oso gertu zuelako Vicentek. Bigarren ilarari heldu diotenean, biak oinbikoetan, azpeitiarrak Sherpa.ai txapelketako txapelduna harrapatu du. Azpitxapelduna hamargarren enborrean bost segundora zegoen eta zezen plazako zaletuak, batez ere azpeitiarraren aldekoak, piztu egin dira. Hirugarren eta azken oinbikoan, ordea, Larrañagari adar begia atera zaio eta denborak ihes egin dio. Kanaerdikoetara minutu eta erdiko aldearekin joan da Vicente eta azken sei enbor horietan ez da ezustekorik izan. Bi aizkolariek prestakuntza eta maila bikaina erakutsi dute, eta ikuskizuna, paregabea. Beheko harmailak bete dituzten herri kirol zaletuek gogotik eskertu dute bi aizkolarien lana amaieran.
Ia bi minutuko aldea atera dio nafarrak Mikel Larrañagari. Vicentek hemezortzi enborrak 47 minutu eta 47 segundutan bota ditu. Azpeitiarrak 49.40an geratu du erlojua.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!