Nire bidaia jarraitu nuen beraz buruan antolatuta neraman bezala, La Higuerara, komandantea hil zuten tokira, iritsi arte. Bertan bai elkarrizketatu ahal izan nituen Che ezagutu zuten pertsonak eta haien bitartez izan nuen «Che Guevararen madarikazioaren» berri.
Herri sinismenak dio, Che Guevararen hilketan nolabait parte hartu zuten militar guztiek egoera arraro xamarrean euren bizia galdu zutela edo denboraren poderioz beste ezbehar batzuk jasan zituztela. Hona hemen nire koaderno txikian jaso nuen informazio guztia:
GARY PRADO
1967ko urriaren 8an Guevara atxilotu zuten gerrillarien kapitaina izan zen bera. 1980. urtean Gary Prado gurpil-aulkian geratu zen ustekabeko tiro batek bizkarrezurra kaltetu ondoren. Gaur egun laurogeita lau urte ditu.
RENE BARRIENTOS
Boliviako presidente ohia zen garai hartan, berak eman zuen Che hiltzeko agindua. Helikoptero istripu batean hil zen Bolivian berrogeita bederatzi urte besterik ez zituela.
JOAQUIN ZENTENO
Zazpigarren dibisioko komandantea izan zen Boliviako Santa Cruz izeneko hirian. Guevara hil zuen militarra aukeratu omen zuen berak. Tiro egin ziotenean ere bertan zegoela esaten dute. Parisko kaleetan hil zuten, 1976ko maiatzaren 11an, bi sikariok.
ANDRES SELICH
Jeneral boliviar honek Che Guevararen gorpua desagerrarazi zuen. Berari buruz ez dago informazio zehatzik, 1973an erail zutela besterik ez.
ROBERTO QUINTANILLA
Bere aginduz moztu zizkioten eskuak Che komandanteari. Emakume aleman batek erail zuen, ustez gerrillariaren heriotzaren mendekuan.
Eta azkenik aurretik aipatu bezala Mario Teran, Che Guevara tirokatu zuen soldadua. Bere bizitza osoa une hartan laburbiltzen da, munduko historia betirako aldatuko zuen momentu hartan. «Ez nintzen ausartzen tiro egitera, Guevara nuen aurrean, 'gizon bat hiltzera zoaz!', esan zidan berak eta azkenean begiak itxita tirokatu nuen», esan zuen elkarrizketa batean.
«Asko dira Che Guevararen inguruan gaur egun ere esaten direnak... eta nik behin eta berriz galdetzen diot neure buruari: 'Nolakoa izango litzateke bizi garen mundua erail ez balute?'»
Minbiziak eraman du gizona, duela urte dezente ia itsu geratu zela ere esaten dute, mediku kubatarrek ebakuntza baten bitartez sendatu ahal izan zuten arte.
Zurrumurruak, herri sinismenak… asko dira Che Guevararen inguruan gaur egun ere esaten direnak.. eta nik behin eta berriz galdetzen diot neure buruari: «Nolakoa izango litzateke bizi garen mundua erail ez balute?».
Nork daki…