Udaberriko ongizate hitzaldiak prestatu du Amarozko auzo elkarteak; datorren astean hasi eta ekaina bitarte luzatuko da ekimena. Elkartetik aurreratu dutenez hizlariak bertatik bertarakoak izango dira: "Inguruko adituak etorriko dira eta gaiak ongizateari buruzkoak dira, beti ere ongizate hori modu zabal batean ulertzen dugulako".
Datorren asteartean, martxoaren 15ean, 19:00etan, Amarozko auzo etxean abiatuko dute hitzaldi zikloa. Leire Aramendik Pedagogia sistemikoa aztertuko du. Gehiago ere zehaztu dute elkartetik: "Pedagogia sistemikoa bizitza begiratzeko beste modu bat da. Norberaren sistema familiarra gerturatzeko bide bat".
Esan bezala, hitzaldiak ekaina bitarte luzatuko dira. Hizlariak oraindik aurreratu ez badituzte ere, gaiak eta datak zehaztuta daude dagoeneko. Esaterako, apirilaren 5ean, astrologiaz ariko dira; maiatzaren 12an, olio esentzialei buruz; eta azkenik, ekainaren 14an, autoezagutza eta garapen pertsonalari buruz.