Astelehenak pentsiodunen aldarrikapen egunak dira, eta gaur ere kalera atera dira. Emakumeen Nazioarteko Egunaren bezperan kolore morea izan du aldarrikapenak. Emakume pentsionistek borrokan jarraituko dugu lelodun pankartarekin zeharkatu dituzte Tolosako kaleak.
Pentsiodunek hilabeteak daramatzate pentsio duinak eskatzen, eta, gaur, Onekako emakumeek Zaintzaren Arreta Publiko eta Unibertsalerako sistema aldarrikatu dute. Manifestazioari ekin aurretik, 'Arrakalarik ez' idatzi dute, eta hizkiz hizki, "arrakalarik" idatzi dute emakumeen artean. "Zaintza ezin da izan soilik emakumeen ardura, ordainketarekin edo gabe".
"Adineko emakumeak kultura heteropatriarkal honetan sozializatuak izan ginen, gure rolak eta praktikak, aukerak eta ibilbideak baldintzatu zituen errealitatearen eraikuntza sexuatua onartuz", azpimarratu dute Onekako emakumeek. "Bizi garen ordena patriarkal hori desagerrarazi eta suntsitu behar dugu".
Hainbat konpromiso eskatu eta aireratu dituzte. Bizi kalitate eta gizarte estimu handienarekin bizitzea ahalbidetzen duten neurrien alde borrokatuko dira, hau da, "pentsio duinak defendatzea, autonomiaz bizi ahal izateko". Zainketa ahalik eta hoberenekin zainduak izateko eskubidea defendatuko dute. Eta horrez gain, mendekotasuna duten pertsonentzako etxeko arreta defendatu eta eskatu dute.
"Zahartzaroan ohikoak diren gaixotasunak prebentzioz tratatzeko programak egitea eta proposatzea" izan da beste eskakizunetako bat, eta "egungo egoitzen ordez, etxe autogestionatuak eta adinekoentzako etxe komunalak proposatzeko konpromisoa" hartzen dutela zehaztu dute.
Manifestazioa egin dute Alde Zaharreko kaleetan aldarrikapen mezuak zabalduz. Emakumeen plazan abestu, eta berriz ere Plaza Zaharrean elkartu dira Amaia Agirre bertsolariak idatzitako bi bertsoak abesteko: "Zaintza parekide bat noiz, ote zaigu iritsiko; beti emakumeen esku, aski dugu eta kito!; berdintasunaren alde, inoiz ez dugu etsiko".