Tolosako Udalak Iurramendi egoitzaren aurrean dauden 81 udal baratzeak esleitzeko zozketa egingo du datorren astelehenean, otsailaren 14an. Zozketa udaletxeko batzar aretoan izango da, 18:30ean hasita.
Udaletik azaldu dutenez, COVID-19ak eragindako osasun egoerarengatik eta indarrean dauden edukierak kontuan izanda, zozketa ez da jendaurrean egingo eta streaming bidez jarraitu ahal izango da Tolosako Udalaren web orrian (Tolosa.eus).
Baratzeak lau urtetan erabili ahal izango dira. 81 baratzeak esleitzeaz gain itxaron zerrenda ere osatuko dute. Zozketaren emaitzen berri udal webgunean emango dute, Ingurumen saileko atalean.