Saharar errefuxiatuen kanpamentuetara bidaltzeko janari, higiene produktu eta eskola materialaren bilketa abiatu du gaur Tolosaldea Sahararekin elkarteak. Goizean, Tolosako eta Villabonako supermerkatuetan aritu dira bilketa egiten. Herritarrei esku-orriak banatzen aritu dira, bilketaren inguruko informazioa zabaltzeko, eta erosketak egin ondoren, nahi izan duenak, elkartasuna adierazi eta egokitutako lekuan zerbait uzteko aukera izan du. Horrela, erosketako orga betetzen joan ahala, bertatik produktuak hartu eta kaxetan sailkatzen aritu dira elkarteko kideak.
Gaurko ekimenak "erantzun ona" izan duela adierazi dute elkartetik. Bilketa, ordea, ez da hemen amaitzen. Otsailaren 4ra bitarte eskualdeko ikastetxe, udaletxe eta saltokietan ere aukera izango da produktu eta materialak uzteko. Besteak beste, lekaleak, pasta, arroza, azukrea, olioa, eta atuna eta sardinak oliotan bildu nahi dituzte, eta baita konpresak, haur eta helduentzako pixoihalak eta eskolako materiala ere.
Behin bilketa eginda, otsailaren 7an eta 8an herriz herri egindako bilketak jasotzen ariko dira elkarteko kideak, eta guztia sailkatzen dutenean, kamioia kargatu eta errefuxiatuen kanpalekuetara bidean jarriko dute. Iaz, 3.500 kilo bidali zituzten eta aurtengorako ondorengo erronka ezarri dute: iazko kopurura iritsi edota kilo gehiago biltzea.