00:30ak aldera Ertzaintzak 22 urteko gizonezkoa atxilotu du Tolosan, kafetegi batean lapurreta egitea leporatuta. Kafetegiko alarma aktibatu dela eta, Ertzaintzaren herritarren babeserako patruila bati kafetegi batera hurbiltzeko eskatu diotela adierazi dute Ertzaintzatik.
Kafetegira gerturatu eta ertzainek gizonezko bat aurkitu dutela zehaztu dute handik gertu dagoen garaje baten ertzean makurtuta. Gazteak eskuan zauria zuela argitu dute Ertzaintzatik, eta adierazitako establezimenduko plastikozko poltsa bat zeramala. Poltsa barruan miatu ostean, material ezberdinekin batera, 350 bat euro aurkitu dizkiote, eta horren aurrean, ertzainek atxilotu egin dute lapurreta egitea leporatuta.
Atxilotua datozen orduetan jarriko dute Tolosako Guardiako epaitegiaren eskuetan.