Joan den astean hastekoak ziren asfaltatze lanak Usabalgo industrialdean eta Montesku auzoko geltokietako bidean, baina zenbait langilek Covid-19 gaixotasunaren probetan positibo ematearen ondorioz, astebetez atzeratu zituzten lanak eta gaur hasi dira. Asfaltatze lan horiek amaitutakoan, San Frantzisko eta Pedro Tolosa kaleen arteko bidegurutzea biribilgune bilakatzeko obrei ekingo diete.
Asfaltatze lanetarako eremua prestatzen hasi dira gaur, besteak beste, Monteskuko bide bazterrak garbitzen; datorren asterako asfaltatuko dute geltokietako bidea. Usabalen ere gaur ari dira markatzen sakonago konpondu beharreko zoladura, eta lanak hasi aurretik egingo dute trafiko aldaketa; hain zuzen, kiroldegiko bidetik zubiraino zentzu bakarreko bidea ezarriko dute.