Koronabirusa

COVID pasaportearen kontrako elkarretaratze jendetsua Tolosan

Tolosaldeko Ataria 2022ko urt. 15a, 12:51

Eguerdian Tolosako Trianguloa plaza bete da pankartaz eta jendez. Guztiak Bizitza plataformak deituta elkartu dira eta errebindikazio bat baino gehiago bazuten jendartean zabaltzeko: 'Gune askeak denontzat; COVID paserik ez' leloaren bueltakoak guztiak.

Jende ugari eta "osasunaren eta askatasunaren alde" mezu askotarikoak zabaldu dituzten zabaldutako pankartetan: "Osasun pasea? Inposizioa diskriminazioa da", "Gune askeak denontzat", "Haurrak ez ukitu" edo "Beldurraren birusak sen ona hil du", besteak beste.

Goizean goizetik Bizitza plataformako kideak Tolosan zehar, kotxez eta megafonia bidez euren mezuak zabaldu dituzte eta 12:00tarako Trianguloa plaza elkargune zuten. Deialdiari jende ugarik erantzun dio eta bertan, errebindikazioen eta informazio-emate unea izan da. 

"Koakzio delitua"

Azken batean, Bizitza plataformaren mezua argia da "COVID pasaportea ezartzea" "legearen kontrako" ekintza da euren esanetan: "Pasaportea eskatzea berez koakzio delitua da, Kode Penalak jasotzen duen bezala. Eusko Jaurlaritza pertsonak koakzionatzen ari da, eta beraz, COVID-19 botika esperimentala injektatu ala ez erabakitzeko herritarren hautatzeko askatasuna mugatzen ari da". Honela, Bizitza plataformak honakoa ere gehitu egiten du: "Pasaportea ezartzea zigor bat da uneko legediak babesten duen ez inokulatzeko eskubidea erabiltzen dutenen kontra".

Osasun pasaportea herritar bati eskatzen zaionean kalteturik geratu daitezkeen oinarrizko eskubide konstituzionalak zerrendatu dituzte Bizitza plataformako kideek: "14, 15, 16, 17 eta 18 artikuluak: diskriminazio ezari eta tratu berdintasunari, osotasun fisiko eta moralari, askatasun politikoei, askatasun pertsonalari, ohoreari eta intimitateari buruzkoak".

"Tabernak eta dendak guztionak"

"COVID19 botika injektatzen duten pertsonak ez daude immunizaturik eta kutsatu dezakete ez inokulatzea erabaki dutenek bezalaxe". Bizitza plataformaren baieztapen honi jarraika, COVID pasaportea bertan behera uzteko deia egin dute; gogoratuz toki publikoetarako guztien eskubidea: "Gure herriko tabernak guztionak dira; [...] denda eta komertzio txikiek autonomia ematen digute; [...] kirola egitea eta kultur jardueretara joatea biltzeko eta gizarteratzeko bidea dira".

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!