Beste urte batez, Gabonetarako jarduera bereziak antolatu ditu Topic-ek. Etxeko txikienentzako ikuskizun batekin emango diote hasiera egitarauari; asteazkenean izango da, 18:30ean. Txotxongiloen museoko antzokira bertaratzen direnek, Txotxongillo taldearen Itsasminez obraz gozatu ahal izango dute.
Txikienentzako istorio "samur eta gozoa" dela azaldu dute museoko ordezkariek. "Musikak leku berezia du, obra osoan zehar entzun daitekeelako. Harekin batera, Argi izeneko protagonistak bidaia luze bat egingo du itsasoraino, oparitu dioten maskor batekin". Topic-eko leihatilan edo Topictolosa.com webgunean eskuratu daitezke sarrerak. Bildutako diruarekin, baliabide gutxi dituzten familiei "Gabonetako ospakizun duin bat" izaten lagunduko dietela aurreratu dute: "Horri deitzen diogu guk sarrera solidarioa”.
Bestalde, urtarrilaren 8an, larunbata, 11:00etan gaztelaniaz eta 12:00etan euskaraz, bisita gidatu antzeztuak eskainiko dituzte museoan. "Interesa duten familiei, magiaz betetako txotxongiloen etxean barneratzen lagunduko diegu. Esperientzia ahaztezina izango delakoan gaude". Izena emateko, herritarrek aldez aurretik jarri behar dute museoko ordezkariekin harremanetan, 943 650 414 telefono zenbakira deituz edo cit@cittolosa.com helbidera mezua idatziz.