Hondakinak Prebenitzeko Europako Astea dela eta, Gipuzkoako Foru Aldundiko Ingurumen sailak Ekonomia zirkularra modelatuz eskulturak sortzeko programaren barruan egin dute lana Peñascal Kooperatibako ikasleek. "Lehengaia eta hondakinak, diseinua, ekoizpena eta berrekoizpena, banaketa, kontsumoa, berrerabilpena eta konponketa, jasotzea eta birziklatzea dira kontuan hartu ditugun oinarriak. Oinarri hauek bata besteari lotuta daude, bat eroriz gero denak atzetik doaz; eta bat altxatzeko beste guztiak altxa behar ditugu. Ideia hau landu dugu gure eskulturan, guk lantzen dugun materiala eta prozesuaren bitartez, era erraz batean irudikatuta, oinarrizko elementuak erabiliz, inolako artifizio edo apainketarik gabe. Garrantzia kontzeptuan datza", esan dute Peñascaleko kideek.
Gipuzkoako Foru Aldundiko Ingurumen sailak sustatzen duen programa da Ekonomia Zirkularra Modelatuz, eta hirugarren urtez egin dute. Lanbide heziketako gazteek hondakinen prebentziorako eta kudeaketa egokirako egiten dituzten jarduerak islatu nahi dituztela esan du aldundiak. "Helburua beraz Gipuzkoako lanbide heziketako ikastetxeetako ikasleak sentsibilizatzea eta filosofia hori zabaltzea da", gaineratu du. Aldundiak gaur egin du ekitaldia ikastetxeetako ordezkariekin Donostian, eta Jose Ignacio Asensio Ingurumen diputatuak esan du funtsezkoa dela gazteei "lekua eta ahotsa ematea" ekonomia zirkularrari eta garapen jasangarriari buruz duten ikuspegia azaldu dezaten.