Zutani elkarteak Pobreziaren aurkako jardunaldiak antolatu ditu aste honetarako. Hiru ekitaldi izango dira, guztiak Tolosako Inmakulada Lanbide Ikastolan, 19:00etan hasita.
Lehen ekitaldia atzo izan zen. Hain justu, Combatir el hambre con las sobras liburua aurkeztu zuen Jordi Gaston antropologoak. Liburuan Elikagaien Bankuko jakiak erosteko erabiltzen den diruaz hitz egiten da. Diru horrek, antza, lotura zuzena du elikagaien industriarekin, aldi berean, onuradun nagusia dena.
Bada, bigarren ekitaldia gaur izango da. Solidaridup izeneko hitzaldia eskainiko dute. Tokiko merkataritza solidarioen sarea azalduko dute, Getxoko esperientzia kontatuz.
Bihar egingo dute hirugarren eta azken ekitaldia. Kasu honetan, Janaria ez da zaborra izenburupean mahai ingurua egingo dute. Mahai inguru horretan parte hartuko dute Nevera Solidaria Galdakaoko boluntarioen gizarte elkarteko kideek. Horrekin batera, Janari soberakinak Tolosaldeko ikastetxeetako jantokietan ikerketa aurkeztuko du Tolosaldea Garatzeneko Garbiñe Mendizabalek.