Santu Guztien Eguna da gaurkoa. Hilerrietara joateko eguna, hurbileko hildakoak bisitatzekoa. Eta eskualdeko hilerriak bisitariz bete dira; gehienek eskuetan loreak eta gisa horretako apaingarriak eraman dituzte, gertukoenen memoria egin eta ingurua apaintzeko.
Batzuk, aurreko egunak aprobetxatu dituzte loreak erosi, inguruak garbitu, txukundu eta gaurko egunerako guztia prest izateko. Baina beste askok goizean bertan erosi dituzte loreak, jai eguna izanagatik, loradenda asko zabalik daudelako.
Tolosako eta Amasako hilerrietara joateko udalek autobus zerbitzuak jarri dituzte. Tolosako kasuan, atzo eta gaur Hiribusaren zerbitzu berezia eskaintzen ari dira. Amasan ere, garraio publikoan hilerrira iristeko autobus zerbitzu doakoa jarri du Amasa-Villabonako Udalak, herritarrentzat.