Gaurko ekitaldi nagusienetakoa bazkaria izan da. 340 pertsona inguru elkartu dira plazan jarri dituzten karpetan bazkaltzeko. Bakoitzak bere jatekoa eraman behar zuen eta izena emandako zenbait agertu ez badira ere, prestatutako mahai eta aulki guztiak erabili dituzte. Gainera, Gau Beltza ere ospatzen ari dira Larramendin, eta jende ugari mozorrotu da, batez ere haurrak.
Magiarentzako ere lekua izan da bazkalostean, eta besteak beste, mahaiz mahai ibili dira magoak, beraien magia erakutsiz eta bazkaltiarren txaloak jasoz. Gaur bertan bukatuko dira bi egun iraungo duten festak, eta antolakuntza taldeko Iker Goyak balantze positiboa egiten ari direla esan du: "Jendearen erantzuna bikaina izaten ari da, bai parte hartzeko eta baita laguntzeko ere. Umeak ere gustura ikusi ditugu. Goizean tailerrak zeuden haurrentzako eta goizeko hamaiketako haur dezente zeuden eta gogoz parte hartzeko. Oso gustura gaude festak nola doazen ikusita". Iaz ez ziren egin festak eta aurten berriro antolatzeak auzo giroa sortzeko aukera ematen duela dio Goyak: "Auzo gaztea da, betidanik hori esaten ari bagara ere, baina orain dela gutxi ere etxebizitza bloke berri bat bukatu da eta bertara jendea joan da bizitzera. Gaur jende gazte asko elkartu da bazkarian, haur asko ere, eta hainbeste jende elkartzeak ilusioa pizten du".