Hain justu, Goxua azoka berezia antolatzen duten Saizar, Gozona-Ibañez, Rafa Gorrotxategi eta Eceiza artisau-gozotegietan banatu dituzte gozoak, 300 inguru bakoitzean. Gozona-Ibañez gozotegiko Rakel Ibañezek azaldu duenez, gaurko eguna "tristura pixka batekin" bizitu dute: "Ez egiteko erabakia hartu eta bi astetara normaltasunean geundela eta azokak martxan jarriko zirela jakin genuen, eta gurea geratu da ez aurrera ez atzera". Iaz ere ezin izan zuten egin, eta aurten espero zuten egiteko aukera izango zutela, baina azkenean ez da posible izan. "Datorren urtean seguru betiko martxa hartuko dugula eta behintzat kalera ateratzeko eta postuak jartzeko aukera izango dugula", esan du Ibañezek.
Bezeroek, bere aldetik, eskertu dute gozoa jasotzea. "Palmeratxoa ematerakoan segituan konturatzen da jendea, gaur berez azoka berezia izango zela, eta asko eskertzen dute detaile hori izatea", esan du Ibañezek.