"Udalaren eta herritarren arteko elkarrizketa urte osora zabaltzeko eta udal aurrekontuak modu parte hartzaileagoan lantzeko helburuarekin", aurrekontuak lantzeko metodologia berria martxan jarri du aurten Tolosako Udalak.
Egitasmo zehatzen inguruan jardun baino, unean uneko erronkak edo beharrak aztertzeko helburuarekin abiatu dute metodologia berria, indarrak non jarri eta lehentasunak zein diren elkarlanean identifikatze aldera.
Gauzak horrela, lehenik eta behin udal gobernuak datorren urterako fokoak zehaztu zituen eta horiek teknikariekin kontrastatu eta osatu ziren, ondoren, gainerako alderdi politikoei aurkezteko, ekarpenak egiteko aukera emanez. Azkenik, ekainean herritarrekin partekatu ziren indar-foko horiek tolosarren ekarpenak ere jasotze aldera.
Denbora honetan, jasotako ekarpenen baitan entzute ariketa egin dutela udal sail desberdinen aldetik azaldu du udalak, eta orain, herritarrekin egingo den saio berrian udal barruko lanketaren berri emango da. "Herritarren ikuspegitik, lan hori aberasteko eta osatzeko ko-sorkuntza ariketa egingo dute, dagoeneko udaletik aurreikusia dauden proiektuetatik eta zehaztutako fokoetatik abiatuta, lankidetza publiko-komunitarioa sustatzeko".
7 indar-foko datorren urtera begira
Orain arte landu denari eta jasotako ekarpenei erreparatuz, tolosarrek 2022. urtean arreta berezia honako esparruetan jartzea eskatu diote Udalari: Administrazioaren arintasuna eta gerturatze beharra; zaintza komunitarioa, adinartekotasuna; osasun eta bizi ohiturak; gazteak; bertakoa, Tolosakoa; aldaketa klimatikoa; indarkeria matxista eta LGTBI-fobiak.
Datorren asteazkenean, azaroaren 3an egingo duten saioa lan saia irekia izango da. Kultur etxeko areto nagusian egingo dute, 18:00etatik 20:00etara, eta bertan udal teknikariek, udal ordezkari politikoek eta herritarrek parte hartuko dute. Udaletik esan dutenez, helburua da politika publikoak, aurrekontuak eta herriaren etorkizuna herritarrekin elkarlanean lantzen eta eraikitzen jarraitzea.