Bueltan da musika Tolosako kaleetan. Musikherria egitasmoa bi urteren ostean berreskuratu dute, eta goizean hasi eta gauera bitartean musikari eta artista ezberdinek alaituko dituzte Tolosako kaleak. Dagoeneko ezohikoak diren irudiak utzi ditu gaurkoan Tolosak.
Alaitasuna nabaria zen herritarren aurpegietan. Gogoa, poza eta ilusioa. Izan da fanfarre, txaranga edo dultzaineroen atzetik ibili denik, edo gaurko musika doinuek ezustean harrapatu dutenik edo honelako girorik ezagutu ez duen haurrik. Guztiek, ordea, gustura hartu dituzte Tolosako kaleetan topatutako musikariak.
Tolosa Kantari ere itzuli da, eta jende ugari batu da kantura. Ohiko moduan Tonto kalen hasitakoak jarraipena izan du. Eta Lopez Mendizabal plazan, berriz, eszenatokia izan da musikarien gune. Plaza bete jende bueltan, trago baten aitzakian edo tragorik gabe, musikaz gozatuz.
Ez du etenik izango musikak eta 18:00etan, Euskal Herria plaza girotuko dute musika taldeek. 19:00etan Bonberenea txaranga aterako da kalera, eta 22:30ean, aldiz, Bisuteria orkestraren txanda izango da, Plaza Berrian.