Paperak aldatu dituzte gaurkoan Lander Cornagok, Tais Da Silvak eta Pau Riusek. Izan ere, gaur irakasle izatea egokitu zaie Basque Culinary Centerreko hiru ikasleei. Berazubiko haurrei zuzendutako sukaldaritza tailerra egiteko aukera iritsi zitzaien. Hortaz, gazteak sukaldaritzan murgiltzeko aukera "polita" izango zela ikusita, aurrera egitea erabaki zutela azaldu du Cornagok: "Gure ustez oso garrantzitsua da txiki txikitatik sukaldatzen ikastea, gure ofizioa den gastronomia munduaren inguruan haurrak ere jakintza izateko".
Ijito-beso bezala ezaguna den postrea aukeratu dute, "haurrentzat oso erraza, polita, tradizionala eta ikusgarria den postrea delako". Gauzak honela, sei eta hamalau urte bitarteko gazteekin aritu dira eskuak zikintzen goiz guztian zehar. "Batzuk erraztasun handiarekin ibili dira, eta beste batzuei gehiago kostatu zaie, baina orokorrean benak ikasteko gogo handiarekin etorri dira. Hori izan da guretzat garrantzitsuena", adierazi du Cornagok.