Artubi Kultur Elkarteak antolatuta XIV. Bedaioko Mendi Martxa egin dute goizean. Mendirako eguraldi txarra iragarrita zegoen, eta horren ondorioz normalean 100 parte hartzaile baino gehiago izaten baditu gaurkoan 41 izan dira goizeko lehen orduan Bedaioko frontoitik abiatu direnak.
Antolatzaileak pozik eta eskertuta azaldu dira, eta eskerrak eman dizkie proba egitera animatu direnei. Horiek bi aukera zituzten, luzea (23 kilometrokoa) eta motza (16,5 kilometrokoa). 23 kilometroko zirkuitua aukeratzen zutenek Larrondotik igaro ondoren, Artubi mendia (1.262 metro) igo behar zuten, eta gero, Zaratetik barrena joan Ziziolako gainatik eta Jazkugainatik, eta amaitzeko, Eskoletxera jaitsi eta Bedaiora itzuli. Bada, eguraldi txarragatik Artubirako igoera ez egiteko eskatu diete antolatzaileek parte hartzaileei.
Martxa amaituta hamaiketako ederra zuten zain mendizaleek gorputza berotu eta indarra hartzeko, eta ondoren, behin guztiek amaituta, bazkarirako aukera ere bai Bedaioko frontoian.