Jokin Bildarratz Hezkuntza sailburuari zuzendutako gutun bat landu du Altzoan guraso elkarteak eta atxikimenduak biltzen aritu dira gaur goizean, Trianguloa plazan. Ikastetxeetan ezarritako COVID-19aren aurkako neurri zehatz batzuk arbuiatu ditu eta elkarteko kideek uste dute haurrek momentu oro maskara erabili behar izatea gehiegizkoa dela. "Patioan jolasten daudenean, aire zabalean, ariketa fisikoa egiten dutenean, edota txango eta irteeretan maskara ezin kentzea gehiegizko neurria dela uste dugu, baita diskriminatzailea ere". Hori dela eta, ikasturte honetarako ezarrita dagoen protokoloa berrikusteko eskatu dute, izan ere protokolo hori "ez dator bat kanpoaldeko eremu publikoetan maskararen erabilpenaren inguruan ezarrita dagoen arautegiarekin".
Altzoan guraso elkarteak eskatu du era berean, "gaur egun biztanleri zaurgarrienaren gehiengoa txertatua egonik, EAEko ikastetxeetan ikasleriari ezartzen zaizkion neurriak malgutzea ahalik eta lasterren, maskararen erabilera derrigorrezkoa ez izatea lehenetsiz jolas orduan, txango edo irteeretan, eta heziketa fisikoko saioetan".
