Larunbat honetan, urriaren 2an, haurrentzako bisita gidatu antzeztuak itzuliko dira Topic Tolosako Txotxongiloen Nazioarteko Zentrora. 11:30ean euskaraz izango dira, eta 12:30ean gaztelaniaz.
Topic-etik esan dutenez, arrakasta handia du ekimen honek, eta geldialdiaren ostean, berriro ere programatzen jarraitzeko erabakia hartu dute. "Zentzu handia du jarduera honek, batez ere kontuan hartuta Topic antzerki-diziplina artistiko bati eskainia dagoela". Topic-etik gogoratu dute bisitariei esperientzia "ahaztezina" eskainiko zaiela, txotxongiloen etxean barrena egingo duten bisita gidatu antzeztuaren bitartez, museoko txokoak ezagutuz.
Bisitak hileko lehen larunbatean egingo dituzte: 11:30ean euskaraz eta 12:30ean gaztelaniaz, eta ordubeteko iraupena izango dute. Izena emateko, aldez aurretik zentroarekin harremanetan jarri beharko da, telefonoz (943 65 04 14) edota emailez (cit@cittolosa.com). Talde bakoitzak 5 lagunekoa izan beharko du gutxienez eta 10ekoa gehienez. Pertsonako 10 euro ordainduko dute helduek, eta 8 12 urte arteko haurrek.