«Muturreko igerilari solidario» modura izendatzen du bere burua Carlos Peña tolosarrak. Zeharkaldi luzeak eta elkartasuna uztartzen ditu; horrela, erronka berri bati ekingo dio urriko bigarren asteburuan. Pandemia garaian egin duten lana dela eta, erizainak omendu nahi ditu. Horretarako, 24 orduz ariko da igerian; kasu honetan, Orion.
Gauzak ondo bidean, Arraunetxe paretik irtengo da urriaren 9an, larunbata, 12:00etan, eta 24 ordu geroago, leku berean amaituko du. Bitarte horretan, itsasadarrean egingo du igeri. Orioko Udalak jakinarazi duenez, udaleko Kirol Batzordearen eta Gipuzkoako Erizaintza Elkargo Ofizialaren babesa izango du.