Laskorain ikastolaren inguruetan sortzen ziren auto pilaketak eta egoera arriskutsuak saihesteko eta, bereziki, oinezkoen segurtasun hobetzeko, hirigintza lanak egin ditu Tolosako Udalak.
Ikasturte hasieran, baranda jarri zen Kondeaneko aldapan, Zabalarretako sarrerara bitarte; orain, zutoinak jarri dira ikastolaren sarrera inguruan, autoek espaloi gainean aparkatu ez dezaten. "Modu horretara, ikastolaren sarrera eta irteera orduetan inguruetan sortzen ziren auto pilaketak eta horiek dakartzaten arriskuak ekidin nahi ditugu", adierazi du udalak.
Neurri horiek, ikastolarekin landu eta adostu ditu udalak. "Hasieran, Kondeaneko Aldapako sarrera itxita mantentzea aurreikusi genuen, bertan sortzen zirelako pilaketa eta arrisku egoera gehien, baina Covid-19aren protokoloen arabera, ikastolako bi sarrerak zabalik mantendu behar dira, eta horregatik egin dira lanak eremu osoan", azaldu dute.
