COVID-19ak eragindako pandemiaren eraginez, kalera atera ezinik ibili ondoren, Tolosako Erraldoi eta Buruhandien Konpartsa elkarteak, pasa den larunbatean eskaini zuen lehen emanaldi publikoa, zezen plazan. Harrera ona izan zuen, eta horregatik, bigarren saio bat egitea adostu zuten udalarekin batera.
Saio hori, urriaren 9an (larunbata) izango da, aurreko leku eta ordu berean: zezen plazan, 18:00etan hasita. Larunbateko saiorako sarrerekin izandako gorabeherak ekidin ahal izateko, sarean erosi ahal izango dira, Kulturaplazara.eus webgunean. Asteartean, hilak 28, jarriko dira salgai, 10:00etatik aurrera.
Ekitaldi hau Kultura Plazara ekimenaren barruan kokatzen da. "Jaialdiaren xedea kultura balioan jartzea eta tokiko talde eta artisten lana babestea da, tartean, herrian hain maitatuak diren buruhandiak eta erraldoiak", adierazi du udalak.