Hitzordurik gabe ere joan ahalko da UDATEra

Aurrerantzean, aurrez hitzordua hartuta edo hartu gabe joan daitezke herritarrak Herritarren Arreta Zerbitzuko Bulegora (UDATE), Tolosan; hitzordurik gabeko herritarrak tarteko txandetan artatuko dira.

Herritarrei begirako zerbitzua zabaltze aldera, dagoeneko ez da derrigorrezkoa aurrez hitzordua hartzea Herritarren Arreta Zerbitzuko Bulegora (UDATE) joateko. Orain, aurrez hitzordurik hartu ez duten herritarrei ere emango zaie aurrez aurreko arreta, libre dauden tarteetan.

UDATE sarreran jarri den makinan hitzorduarekin edo gabe joan den hautatu behar du herritarrak, eta horren arabera emango zaio txanda; hori bai, aurrez hitzordua hartuta duten herritarrek izango dute beti lehentasuna. Aurrez aurreko arreta zerbitzua egunero eskaintzen da, astelehenetik ostiralera, 07:15etik 14:15era (ostegunetan, 19:00ak arte).

Telematikoki izapideak egiteko aukera

Aurrez-aurreko arretaren ordez, tramiteak izapideetarako bulego automatizatuaren bidez egiteko aukera ere eskaintzen da UDATEn. Horretarako, makina egunero dago erabilgarri: astelehenetik ostiralera 07:15etik 20:00etara, eta asteburuetan nahiz jai egunetan 08:00etatik 20:00etara.

Telematikoki ere egin daitezke izapideak, norberak aukeratutako unean. Besteak beste, honako tramiteak egiteko aukera dute herritarrek: errolda ziurtagiriak eskuratu, ordainagiriak, ordainketa gutunak edota isunak ordaindu, ordainagirien kopiak eskuratu edo espedienteak kontsultatu.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!