Festa herria da Bedaio, baina egungo egoerara mugatu behar izan dute bedaiotarrek ere. Larunbat iluntzerako zuten lehen hitzordua jarria, eta 100 pertsona inguru elkartu ziren herri afarian, mahai ezberdinetan sakabanatuta. Ondoren, Iratzar erromeri taldearen kontzertuaz gozatzeko aukera izan zuten.
Atzokoa zen festa egun handia, hau da, Andre Mari eguna, eta erretirodunen eguna ospatzeko baliatu zuten. Meza nagusia izan zuten, ohiko prozesio eta guzti. Ondoren, erretirodunen bazkaria egin zuten Abaetxe jatetxean. 40 pertsona inguru izan ziren, eta Haritz Mujika eta Julio Soto bertsolarien konpainia izan zuten.