Eizagirrek 21 urte ditu, eta aurten Realean egon den aldaketa nabarien ondoren, 10 jokalari joan baitira, bera da taldeko kapitaina. "Taldean gustura nago, talde ona daukagu, eta nik uste dut aurten ere urte polita izango dela", esan du tolosarrak, hitzarmena luzatu ondoren emandako prentsaurrekoan.
Taldearen jokoa antolatzeaz gain, golak ere sartzen ditu Eizagirrek. Aurreko denboraldian, hain justu, 13 gol sartu zituen. Manchester City taldearen eskaintza jaso zuela zabaldu zen, baina berak etxean geratzea erabaki du: "Oraindik gaztea naiz eta jokatu egin behar dut. Asko laguntzen dit egonkortasuna izatea, gustura nago hemen eta ikusten dut taldearen aldetik gugan apustua egiten ari dela".