Abian da Azken Muga jaialdiaren seigarren edizioa. Abuztuaren 20an eman zioten hasiera nazioarteko arte eta kultura jaialdiari, eta urriaren 2a bitarte, diziplina, formatu desberdin eta era guztietako jarduerak izango dira, guzti-guztiak auzolanean antolatuta. Pasa den asteburuan tailerrak, kontzertuak, dantza bertikalak, kale antzerkiak eta beste izan dituzte, guztiak, Zarateko lepoan.
Egitarauaren barnean, Sorkabi izeneko artista-egoitza batekin eman zioten hasiera jaialdiari. Hamar egunez, hainbat nazionalitatetako artistek diziplina anitzeko proiektuak egin dituzte, inguruneari zuzenean lotuta. Horrela, Zarateko lepoan, aire zabaleko museoa jarri dute. Tartean, Aitor Otaño eta Nextor Otaño aita-seme grafitigileek, Altzoko Rexu Balerdi artzain eta dantzariaren erretratua egin dute.
Bestetik, 20x20x20 deituriko formatu txikiko eskultura erakusketa prestatu dute Zaratetxean, eta irailaren 12a bitarte egongo da ikusgai. Erakusketa horrek erreferentzia egin dio Barakaldo 71 Arte Plastikoen Lehen Erakusketaren 50. urteurrenari. Guztira 70 pieza inguru bildu dituzte.
Pinturak ere izango du lekua Azken Muga jaialdian. Irailaren 18tik urriaren lehenera bitarte, aurreko edizioetan parte hartu duten margolariek eta Azken Mugako lagunek egindako lanen erakusketa jarriko dute Zaratetxean.
Honako egitaraua dute prestatuta urriaren 2a bitartean:
Irailak 3, ostirala
- 17:00. Gordailua: Ura: muga ala bide?, Xabier Kerexetaren eskutik.
Irailak 4, larunbata
- 18:00. Kontzertua: Apalatxe. Margolana: Alatz Lopez. Slackline: Oreka-T.
- 19:00. Kontzertua: Nikotina & Little Martin. Lekua erreserbatzea beharrezkoa izango da.
Irailak 11, larunbata
- 11:00. III. Aralarko Artzain Gazta Txapelketa.
- 11:30. Ibilbide antzeztua: Suak harrotuz (Arribeko Udala).
- 12:00. Herri kirolak, Amezketa - Araitzeko bailaran. Aizkolariak: Iker Vicente / Ibai Zoroa - Larrañaga / Txomin Amundarain.
- 16:30. Bertso saioa: Julio Soto, Maddalen Arzallus, Anjel Mari Peñagarikano, Andoni Egaña eta Oihana Iguaran. Gai jartzailea: Imanol Artola Felix.
Irailak 17, ostirala
- 10:00 - 18:00. Antzerki tailerra: Bufoien batzarra, Ana Perez Giraldezen eskutik. Aldez aurretik izena eman behar da.
Irailak 18, larunbata
- 10:00 - 18:00. Antzerki tailerra: Bufoien batzarra, Ana Perez Giraldezen eskutik. Aldez aurretik izena eman behar da.
- 17:00. Performancea.
- 17:30. Inaugurazioa: pintura erakusketa.
- 18:00. Ikuskizuna: Euskal dantza.
Irailak 19, igandea
- 10:00 - 18:00. Antzerki tailerra: Bufoien batzarra, Ana Perez Giraldezen eskutik. Aldez aurretik izena eman behar da.
- 18:00. Antzerkia: Bufoien batzarra, Ana Perez Giraldezen eskutik. Aldez aurretik izena eman behar da.
Irailak 25, larunbata
- 17:00. Kontzertua: Et Incarnatus + Donostiako Orfeoia. Izpirituzkoa&herrikoia. Beharrezkoa da lekua erreserbatzea.
- 19:00. Garoa saria: sari banaketa.
Irailak 26, igandea
- Garbiketa auzolanean, egunean zehar.
Urriak 2, larunbata
- 10:00. Itxiera: garo-meta.
Argazkiak: Dani Blanco, Elena Scaratti eta Migel Zeberio.