Caixabank Master binakako pilota txapelketako laugarren jardunaldia itxi da Peña II-Rezusta eta Elezkano II-Mariezkurrena II partida jokatuta. Tolosarrak eta Rezustak osatzen duten bikoteak irabazi zuen atzoko partida, 22-20ko emaitzarekin, lautik lau garaipen batuz. Ondorioz, sailkapen orokorreko lehen postuan daude, 4 punturekin.
Euren atzetik daude Urrutikoetxea-Martija eta Altuna III-Aranguren 3 punturekin berdinduta. Laugarren postuan Etxeberria-Albisu bikotea dago 2 punturekin. Olaiola II-Zabaleta, Elezkano II-Mariezkurrena II, Ezkurdia-Imaz eta Jaka-Tolosa daude ondoren, guztiak puntu bakarrarekin.
Hurrengo jardunaldiari dagokionez, Olaiola II-Zabaleta eta Elezkano II-Mariezkurrena II bikoteen arteko partida izango da ostiralean Donostian. Urrutikoetxea-Martija eta Ezkurdia-Imaz bikotearen artekoa larunbatean Mallabian. Altuna III-Aranguren eta Peña II-Rezustaren artekoa igandean Azkoitian eta bosgarren jardunaldia ixteko, Jaka-Tolosa eta Laso (Etxeberriaren ordezkoa)-Albisuk jokatuko dute asteartean Zarautzen.