Bertakoek, nahiz kanpotik datozenek, Tolosaren historia pixka bat gehiago ezagutzeko parada ederra dute abuztuan zehar. Astelehenetik larunbatera bitartean, bisita gidatuak egiten ari dira Tolosaldea Tour turismo bulegoan. Hiru dira aukerak: batetik, Tolosako Alde Zaharreko bisita; bestetik, Tolosako 3 tenpluak deiturikoa, Santa Maria, Andre Maria eta San Frantzisko elizak bisitatzen dituena, eta, azkenik, Tolosako azoka bertatik bertara ezagutzekoa, azken hau, soilik larunbatetan.
Gaur goizean, esaterako, Alde Zaharreko bisita gidatua egin dute sei lagunek, 10:00etan abiatuta. Andre Maria plazan elkartu dira guztiak, turismo bulegoaren aurrean, eta Brian Cullen aritu da gidari lanetan. Besteak beste, Bizkaitik, Cartagenatik eta Errioxatik etorri diren hiru bikotek entzun dituzte azalpenak, adi-adi jarrita.
Bisita gidatuan zehar, Alde Zaharrean aurkitzen diren eraikuntza eta monumentu desberdinak ikusi dituzte, eta istorio bitxiak ere entzun dituzte. Santa Maria parrokiatik hasita, Aranburu jauregia, errota zaharra, udaletxea, Zerkausia, Gaztelako Atea, Berdura plaza eta Handia dorrea ezagutu dituzte, unean-unean, zegozkion azalpenak jasoz. Bisita amaitzean, Tolosa ezagutzen jarraitzeko tartea hartu dute batzuek eta inguruko beste herrietara joateko aprobetxatu dute besteek.
Bertako gehiago
"Egoera honetan, atzerritik baino jende gehiago dator Espainiatik, baina, orain, opor garaian, esaterako asko dira frantsesak, belgikarrak edota holandarrak", azaldu du Cullenek. Pozik daude Tolosa turismoari begira izaten ari den harrerarekin. "Jendea eguna pasatzera etortzen da, eta bada inguruko herrietako landetxeetan eta hoteletan gaua pasatzen geratzen denik ere, denetik izaten dugu".
Ikusi hemen uztailean jasotako datuak eta abuztuko ordutegiak.