Maiatzean jarri zen Agaramunduko babes ofizialeko etxebizitzen deialdia martxan. Etxebizitza horiek, irisgarritasun arazoak dituzten mugikortasun urri iraunkorra duten pertsonei edo 70 urtetik gorakoei zuzenduta daude. Guztira, 24 eskaera jaso dituzte sei etxebizitzetarako.
Behin eskaera guztiak jasota, ostegunean egin zen zozketa Leidor aretoan. Mugikortasun urri iraunkorra duten pertsonentzako etxebizitza egokitu bakarra dagoenez, zeuden lau eskatzaileren artean oinarrien baitan puntuazio gehien duen pertsonari esleitu zaio etxebizitza. 70 urtetik gorakoen kasuan, berriz, bakoitzari ausazko zenbaki bat egokitu zitzaion zozketarako eta zenbakiak atera ziren hurrenkeran osatu da esleipendunen zerrenda. Gainerakoekin itxaron zerrenda osatu da. Esleipendunen zerrenda nahiz itxaron zerrenda, udalaren webgunean daude ikusgai.