Atzo arratsaldean erabakita geratu zen nortzuk izango diren 53. Berazubiko Pala Txapelketako finala jokatuko dutenak. Lehen finalerdiak bigarren mailako gizonezkoek jokatu zituzten: Garro-Cortazar bikoteak 30-28 hartu zuen mendean Lozano-Zelaia bikotea, eta bigarren partidan, Laso-Beloki bikotea izan zen irabazlea, Gurrutxaga-Konderen aurka 30-29 irabazita.
Lehen mailako gizonezkoen finalerdietan, berriz, Zabala-Sanmiguel bikoteak eskuratu zuen finalerako lehen txartela Luixa anaien aurkako partidan 30-29 irabazita. Finalerako bigarren txartela, berriz, Loidi eta Eskuderok irabazi zuten, 30-25 irabazita Arregi eta Manterolari.
Bihar, beraz, Berazubiko Pala Txapelketako irabazleak nortzuk izango diren jakingo da. Asteartean erabaki zen emakumeen mailan zein izango diren finala jokatuko dutenak: Balerdi-Urien bikotea Karrera-Muruaren aurka arituko da. Eta gizonezkoei dagokienean, bigarren mailako lehian, Garro eta Cortazarrek Laso eta Beloki izango dituzte aurrez aurre, final handian. Eta lehen mailan, Zabala eta Sanmiguelek Loidi eta Eskuderoren aurka jokatu beharko dute. Jaialdia 17:30etan hasiko da, Berazubin.