Pfizer, Moderna, Janssen
petaloak ur gainean doaz
oraindik heldu ez den mahatsaren
ardoaz, diadema bat Maulerentzat.
Zer liburu irakurriko ditu bizitzan?
Zein whiskey gustatuko zaio?
Gu egon gara itsu: bera beti egon da munduan
itzala dagoen bezala hontzaren argian.
Eta orain bikote maiteminduek
ikusten gaituzte kalean eta beraiengan pizten da
poema honek piztu ez dezakeen
irudipen bat:
ume bat jaio dela
autobus elektrikoen garaian Tolosan.
Zeintzuk izango dira bere zaldiak gauean?
Non aurkituko du ur bat oso urdina?
Gu egon gara itsu: bera beti egon da itsasertzean
eta ama eta ni ginen irla deika.