III. Sestaoko Udalaren Bandera zegoen gaur jokoan Portugaleten, eta beste behin Tolosaldea trainerua gailendu da. Gauzak honela, bost estropadetatik lau irabazi dituzte oraingoz. Gaurkoan TAK klubeko arraunlariek 10.40,73ko denbora egin dute, eta bigarren izan den Deustori sei segundoko abantaila atera dio. Hibaika izan da hirugarren, zortzi segundora, eta laugarren Zumaia helmugaratu da, ia 13 segundoko tartearekin.
Bosgarren jardunaldiaren ondoren, Tolosaldea ligako lehen postua mantentzen eta sendotzen doa. Izan ere, 54 puntu ditu eskualdeko traineruak, eta bigarren doan Deustok 49 puntu ditu. Hirugarren doa Hibaika 45 punturekin, eta Zumaia laugarren, 38 punturekin.