Ertzaintzak bi pertsona atxilotu ditu Tolosako San Esteban auzoan aparkatuta zeuden bi autokarabanatan lapurreta egiteagatik. Ertzaintzak dei bat jaso du eta gerturatzean ihes egiten ari ziren bi pertsona atzeman ditu. Banketxetako txartel batzuk, objektu elektronikoak, arropa eta janaria zituzten soinean.
Ertzaintzak esan du, gazteek zeramatzaten objektuen jatorria identifikatzen saiatu direla eta jakin ahal izan dutela inguruan aparkatuta zeuden eta alboko leihoak behartuta zituzten bi autokarabanatakoak zirela. Horren aurrean, bi pertsona horiek atxilotu dituzte indarrez lapurreta egitea leporatuta, eta Ertzaintzaren egoitzara eraman dituzte dagozkien polizia-eginbideei hasiera emateko. Bi atxilotuak gaur jarriko dituzte agintari judizialaren eskuetan Tolosako Guardiako Epaitegian.