Valladoliden izan ziren atzo Tolosa CF-ko gimnastika erritmikoko taldeko neskak. Pasa den hilabetean Espainiako Taldekako Kopako lehen faserako txartela lortu ostean, gogoz jarraitu dute lanean eta ilusio handiz egin zuten bidaia.
Irene Arbeloa, Ismene Agirre, Aitane Goikoetxea, Ane Alustiza eta Mara Herrera dira Lehen Mailako taldeko neskak. Eguerdian izan zuten txanda, eta xingola eta pilotarekin ariketa borobila egin zuten tapizean. Horrela lehen mailako Espainiako Kopako txapeldun izan ziren. Gimnastentzat lehen domina izan da lehen mailan lehiatzen direnetik.
Junior taldea osatzen duten gimnastek, June Bengoetxea, Saioa Zeberio, Ane Barandiaran, Ahetze Olano, Maite Iturrioz eta Aroa Zugastik, bi xingola eta hiru uztaiekin defendatu zuten ariketa goizean goiz, sailkapen orokorrean 10. postua lortuz. Bi taldeetako gimnastei ongietorria egin zieten atzo arratsaldean, klubak Usabalen duen pabiloiaren aurrean.
Gimnasten hurrengo erronka uztailean izango da Valentzian. Bertan Taldekako Kopako bigarren fasea ospatuko da. Klubetik gimnastak, entrenatzaileak eta familiak zoriondu eta eskertu nahi dituzte, «une zail hauetan egiten ari diren esfortzuagatik». Baita Valves CMO, Pulidos Leunlan, Mecanizados Garmendiola eta Garaje Tolosari, «gure klubarengatik egiten ari diren guztiagatik». Bide batez, Tolosa CF-tik azaldu dutenez, datorren ikasturterako izen-emate epea zabalik dute. Horretarako cgrtolosa@gmail.com helbidera idatzi daiteke.