Langilea 1973. urtean hasi zen lanean orduan Tolosan zegoen Telleria galdategian eta Fudike enpresan jarraitu zuen ondoren. 2016an diagnostikatu zioten minbizia Donostia Ospitalean eta 2017an hil zen. 2019ko maiatzean onartu zuen Gizarte Segurantza Institutu Nazionalak langileak zuen gaixotasuna lanak eragindakoa zela eta beraz alargunak jaso beharreko saria igotzea hobetsi zuen. Fudike, Ceosa eta Telleria galdarategiek eta Norton And Willow enpresak helegitea jarri dute langileak gaixotasuna erretzailea zelako garatu zuela argudiatuz.
Osalanek gaia aztertu du eta Asviamie elkarteak azaldu duenez, txostenean jaso du posible dela Jose Manuel M.A. langileak amianto zuntzak arnastu izana, gutxienez Tolosako Telleria galdategian. "Fremap.ek eta enpresak zalantzan jartzen dute langileak minbizia sortzen duten substantziak arnastu izana, eta bere heriotza erretzailea izateari egotzi nahi izan diote, horrela euren erantzukizunari muzin eginaz eta lanean sortutako minbiziaren ondorioz hil zen beste langile baten kasua ezkutatuz", esan du amiantoaren biktimen taldeak. Egoera salatzeko elkarteak elkarretaratzea egingo du bihar, 09:40ean Donostiako epaitegien aurrean. Hildako langilearen familiari babesa azalduko diote eta Fremap mutualitatearen eta galdategia izan duten ondorengo enpresek jarritako helegitea salatuko dute. Era berean, amiantoaren biktima izan direnei zuzendutako konpentsazio funts bat sortzeko eskatuko dute.