Sidi Ethman Sidi Dghaoui

Aberrigabea da, eta eskaera eginda du. Sahararra izatez, Mauritaniara egin zuen lehenik bidea eta handik Kanaria Handira, itsasoz. Kalean geratu zen iritsi zenean, eta kontatu du ez zela inolako Gobernuz Kanpoko Erakundeetara joan, ezta poliziarengana ere. Kanaria Handian bi egun egin zituen. Dioenez, pertsona batek itsasontzirako txartel bat ordaindu zion Kanaria Handitik Bilbora joateko. «Ez dakit zein hiri eta herrietatik igaro naizen Bilbora iritsi arte». Maiatzaren 21etik dago Zuloaga Txikin. Aldi baterako dago bertan, beste lekuren batean plaza esleitzeko zain baitago.

«Hona iristean esperantza da aurkitu dudana, bizitzeko esperantza, nire egoera hobetu daitekeela ikusi dut», dio Sidi Ethman Sidi Dghaouik. Tolosan duen asmo nagusia gaztelania ikastea da, «gizartean integratu ahal izateko eta euskal kultura hobeto ezagutzeko». Lana ere aurkitu nahiko lukeela esan du, «ondo bizitzeko».

Egunerokoan pozik bizi da Zuloaga Txikin: «Goizean otoitz egiteko esnatzen naiz 06:00etan, eta berriro ohera sartzen naiz; gosaldu ondoren, kirola egiten dut, gimnasiora ez banoa, korri egitera ateratzea gustatzen zait; tea hartu, eta gaztelaniako lanak egiten ditut. Bazkaldu ondoren, denbora hartzen dut, esaterako, telebista ikusteko».

Gustura sentitzen da Euskal Herrian, hala aitortu du: «Orokorrean beste kulturak ezagutzea asko gustatzen zait, eta euskal gizartea nahiko irekia dela esango nuke, positiboki baloratzen dut».