Ikasturtea umorez amaitzeko, Beatriz Egizabal aktorearen bisita jaso dute Tolosako Aitzol Udal Euskaltegiko A2 eta C1 mailetako 30 ikaslek. Egizabalek, Euskaraldia aitzakia hartuta, bakarrizketa saioa eskaini die. “Euskararen inguruko hausnarketa propioa egitea etorri naiz”, esan du saioa hasi baino lehen. “Zer gertatu da Euskaraldiaren ondoren? Gauza asko; besteak beste, oraindik ez dugula rola ondo aukeratzen. Gaixotuta dugu hizkuntza, eta sendatu beharra daukagu”, gaineratu du.
Besteak beste, Ahobizi eta Belarriprest banaren paperean jarri, eta hainbat egoera antzeztu ditu. “Errealitate batzuen adibideak azaltzen saiatu naiz, ikasleek horien inguruan hausnartu dezaten. Batez ere, “saio entretenigarri bat egitea” zen Egizabalen hasierako helburua; gero, barreak eta algarak izan dira ikasleen artean. “Oraindik ere, ikasten ari dira, eta beraz, ulermena lantzen saiatu naiz. Nik esandakoa ulertu badute, garaipena izan denaren seinale. Bestetik, aipatutako egoera ezberdin horietan, euren burua islatuta ikustea nahi nuen, ikasle bakoitzak bere buruaz barre egin zezan”.
Behin Euskaraldiari buruz hausnartu ondoren, saioaren bigarren zatian, errietak egiteko euskarazko esamoldeak sortzen irakatsi die ikasleei. “Horrelakoetan, gaztelerara jotzeko ohitura handia dugu, baina ohiturak aldatzeko daude. Beraz, errietak euskaraz egiteko zenbait proposamen egin ditut”. Bakarrizketari amaiera emateko, bertso bat abestera ausartu da Egizabal: