T3T eta T2T mendi lasterketak 2021

Eskualdeko lasterkariak daude faboritoen artean

Hassan Ait Chaou, aurreko edizioan helmugara irabazle moduan iristen.

T3T maratoia eta T2T mendi lasterketen eguna iristear da. Igandean 09:00etan aterako dira T3T egingo duten 300 lasterkariak, eta beste horrenbeste abiatuko dira 09:30ean T2T proba egiteko.

Tolosako Trianguloa plazatik aterako dira, eta COVID-19aren inguruko neurriak direla eta, ezingo da publikorik izan inguruan.

Faboritoen zerrendari dagokionez, T3T proban, gizonezkoetan Hassan Ait Chaou billabonatarrak aurreko edizioan lortutako garaipena defendatuko du, eta aurkari gogor bat izango du, Ismail Razga, 2016an eta 2017an irabazle izan zena. Emakumezkoetan ez dira aurreko edizioko podiumean izan zirenak egongo, baina aipatzekoa da Aitziber Ibarbia zizurkildarra eta Laiane Arrospide ibartarra bertan izango direla. T2T proban Oier Ariznabarreta izango da faborito nagusia gizonezkoetan eta Lurdes Oiartzabal emakumezkoetan. Oihana Zubillaga anoetarrak eta Enara Agote tolosarrak zeresana eman dezakete proba motzean.

Gogoz daude antolakuntzatik eguna iristeko, eta egunotan azken prestaketak egiten ari dira, besteak beste, bideak garbitzen. Eguraldi beroa egitea espero da, eta baliteke termometroa 30 gradura iristea.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!