Urtero, udaberrian eta udazkenean Sormenetik izeneko saio bana antolatzen ditu Galtzaundi Euskara Taldeak. Sormenari eta euskal kulturari buruz gogoeta egiteko saioak izan ohi dira Tolosako Zerkausiaren azpialdean antolatzen direnak. Gaur egin da aurtengo lehen saioa eta Kai Nakai abeslari eta musikagilea izan da hitzorduko protagonista. Oizeder Mayo kazetari zizurkildarra izan da oholtza gainean Kai Nakairekin batera, eta bere sormen prozesuaren, musika egiteko estiloaren hautuaren eta beste zenbait gairen inguruan aritu dira solasean.