Tolosako Asanblada Feministako kideek, «gogor» salatu dute larunbatean Tolosan gertatutako eraso matxista. «Titularrak eman eta eman jarraitzen du indarkeria matxistak. Kasu honetan, gainera, bertako lerroburu batean irakurri behar izan dugu albistea».
Gaurko elkarretaratzean, «babes osoa» helarazi nahi izan diote erasoa jasan duen emakumeari. «Nazkatuta gaude halakoak jasan behar izateaz, eta nazkatuta, nazkatuta gaudela errepikatzeaz. Baina hori da sistema kapitalista patriarkalaren zurrunbilo beltza, botere harremanetatik edan beharra. Menpeko eta menperatzaileen eskema horretan, indarkeria matxistak ez du mugarik», adierazi dute.
Horregatik, indarkeria matxistak, «lehen mailako arazo politiko, sozial, ekonomiko eta kulturala izaten jarraitzen duela» azpimarratu dute. «Erasoa beti delako isolatua, eta berriz ere, biktimaren jendartearen antolaketak mantentzen duelako zurrunbiloa bizirik».
Errealitate hau «iraultzeko», eragile sozial, politiko eta instituzionalen ardura pertsonal eta kolektiboa «ezinbestekoa» dela aldarrikatu dute. «Hitzetatik praktiketara pasatzeko garaia da». Amaitzeko, gogora ekarri dute autodefentsarako «lanean» jarraituko dutela: «Feministok erantzuteko prest gaude!».