Bestalde, Tolosako Udalean oposizioan dagoen EH Bildu alderdiko ordezkariek, udal gobernuak izandako jarrera salatu dute, gai honen inguruan «berriro ere aldebakartasunez jokatu duela» adieraziz. «Azken osoko bilkuran, alkateak muzin egin zion Tolosaldeko Alkateen Mugimendura batzeko deiari, eta tolosarron ordezkari bezala, Alkateen Foroak deitutako bilerara ez zela bertaratuko gaineratu zuen, gezurrez eta deskalifikazioz beteriko hitzartze batean».
Informazio hori eskualdeko gainerako udal ordezkariekin partekatzeko, Alkateen Foroa «leku aproposa» zela nabarmendu dute EH Bildutik, kokapenaren inguruan eztabaidatu eta erabakiak adostasunez onartzeko. «Ez da onargarria eskualdeko osasun sistema eta azpiegituren inguruan lanean horrenbeste urtetan aritu diren talde politiko, eragile, herritar zein gainerako udalek, Tolosako udal gobernuaren erabakiaren berri prentsaren bidez jasotzea». Osoko bilkuran, ordea, Tolosako alkateak adierazi zuenez, «prentsaren bitartez soilik» izan du Tolosaldeko Alkateen Mahaiaren berri.
Bilkura berean, ondorengoa adierazi zuen Peonek: «Ospitalearen kokapenaren azterketa bukatzean, gardentasunez jokatuko dugu herritar, alderdi politiko eta eragile guztiekin, urrats guztien berri emanez, eta alde guztiekin partekatu ondoren iragarriko da erabakia». Horren aurrean, «bere hitza jan duela» eta «albistea, alde guztiekin informazioa partekatu baino lehen eman duela» salatu dute oposiziotik. «Kokapenaren egokitasuna ezbaian jarri gabe, honek argi erakusten du, guk apirilean iragarri bezala, Osakidetzak jada erabakia zuela kokalekua».
Azterketaren kudeaketa moduak alde batera utzita, Tolosako EH Bildutik berriro deitu dute Olatz Peon alkatea, Tolosaldeko Alkateen Mugimenduan parte hartu dezan. «Bertan partekatu ditzala udal gobernuaren erabaki eta iritziak, Tolosaldeko Ospitalearen kokapena, osasun arreta zerbitzua eta Asuncion Klinikako langileen etorkizuna, eskualde mailako ordezkarien artean eta Osasun Sailarekin elkarlanean adosteko».