Gertatutakoa kontrastatu eta egiaztatu duela esan du udalak, eta beharrezkoak diren baliabide guztiak emakume erasotuaren esku jarriko dituela esan du, baita laguntza psikologikoa eta juridikoa ere, "bere intimitatea eta borondatea hasiera-hasieratik errespetatuz". Olatz Peon Ormazabal alkateak esan du ez dela bortxaketa bat izan eta emakumeak salaketa jarri duela. Horiek horrela, eta Tolosako Udalak indarkeria matxistari aurre egiteko duen protokoloaren harira, erasoa gaitzetsi dute eta Gizarte Zerbitzuetako arduradunak jarri dira emakumearekin harremanetan, udalaren baliabide guztiak bere esku jartzeko. "Emakumeak salaketa jarri du, baina zein bide egin erabaki behar du. Udalak bere erabakia errespetatzen du", gaineratu du.
Horrekin batera esan du herriko mugimendu feministarekin eta gizarte eragileekin elkarlanean, indarkeria matxista desagerrarazteko borrokan jarraitzeko konpromisoa berresten duela udalak, "indarkeria matxistarik gabeko herri baterantz aurrera egiteko programak eta zerbitzuak ezarriz".
Bukatzeko esan du instituzioen ardura dela giza eskubideak bermatzea, baina eraso bat saihesteko herritar bakoitzaren jarrera aktiboa erabakigarria dela gogoratu du. Gizon eta emakumeen berdintasunaren aldarrian, udalak emakumeen duintasuna, sexu askatasuna eta integritate fisikoa eskubide urraezinak direla azpimarratu du, era berean.
Elkarretaratzera deitu du bere aldetik, Tolosako Asanblada Feministak. Bihar egingo du 19:00etan, Trianguloa plazan. Asanbladak "gogor" salatu du eraso sexista eta babes osoa azaldu dio emakumeari. Herritarrei egin die dei erasoa salatu eta biharko deialdiarekin bat egiteko. "Ez dugulako eraso bakar bat ere onartuko! Emakumeen aurkako indarkeriari EZ, autodefentsa feminista!".