Gari Etxeberriak eman du albistea aurkezpen ekitaldian: Inhar Urruzunok min hartu du eta ez da osatuko larunbaterako. Ondorioz, Aitzol Atutxa eta berak osatzen zuten bikotea lehiatik kanpo geratu da. Hala eta guztiz ere, 11 bikote ariko dira finalerako sei txartelen lehian. Horien artean egongo da Iñaki Errazkin, eskualdeko ordezkari bakarra. Tolosarrak Aratz Mugertzarekin osatuko du bikotea.
Binakako pentatloi txapelketaren kanporaketa 18:00etan hasiko da, eta Ataria Irratiak zuzeneko kontakizuna egingo du Tolosako zezen plazatik. Mikrofonoa eskuetan dutela ariko dira Joseba Otaegi, Alatzne Etxaburua eta Jon Goikoetxea 'Boli'.