Bost erkidegotik etorritako 12 -15 urte bitarteko 100 gaztek Roberto Jauregi omenduko dute, ahal den era onenean, igeri egiten.
Igarondo Urpekoak taldeak antolatzen du proba, XVIII.ena. Roberto Jauregi ekarri dute gogora: «Hegats igeriketa Tolosara ekarri zuen entrenatzailea izan zen eta edozein kirolariri laguntzeko prest zegoelako ezagutzen dute tolosar askok eta askok».
Txapelketa 15:30ean hasiko da, eta Aragoi, Nafarroa, Galizia, Katalunia eta Euskadiko igerilariak ariko dira. 50 metrotik hasita 400 metro arteko probak gauzatuko dira, eta antolatzaileek uste dute ikusleentzat oso formatu ikusgarria izango dela. Igarondo Urpekoak taldeko 10 igerilari izango dira. Beraientzat esperientzia polita izatea espero dute taldetik. Antolatzaileek Tolosako Udalari zein Cartonajes Limousin eta Copytec babesleei eskerrak eman dizkiete eskainitako laguntzagatik.