Amarozko basoa eta urmaela balioan jartzeko ekintzak egiten ari da Tolosako Udala. Iaz hasi ziren Amarozko basoaren berreskuratze lanak, eta herriko gazte talde batekin elkarlanean, udalak antolatutako auzolandegietan, urmael bat sortzeko lehen pausuak eman zituzten. Ordutik, herriko ikastetxeek eremua erabiltzen dute bertan baso eskola proiektua garatzeko eta ingurumenarekin lotutako ekintza didaktikoetarako, eta etorkizun hurbilean, udalak urmaela egokitzen jarraituko duela esan du.
Era berean, eremua Eskolarteko Urmaelen Sareko partaide izateko beharrezko laguntza emango duela esan du udalak. Izan ere, eremua erabiltzen duten ikastetxeek Aranzadi Zientzia Elkarteak gidatzen duen Eskoletako Urmaelen Sareko partaide izateko interesa agertu dute. Ekimena haur hezkuntzatik hasita, irakasleetaraino zabaltzen da eta helburu nagusiak dira ingurumenarekiko kontzientziazioa, planetarekiko errespetua eta espezieen kontserbazioa sustatzea eta bioaniztasuna hobetzea. Amarozko urmaelean, Aranzadiko adituen gidaritzapean, ikasleek egingo dituzte urmaela egokitzeko lanak, eta, lanak amaitu ondoren, ikastetxeek zainduko dute urmaela. Putzura gerturatzen diren animalia espezieak identifikatzeko eta sortuko den bioaniztasuna eta ingurumen aberastasuna aztertzeko aukera izango dute.
Horiek horrela, Amarozko basoa eta urmaela tolosar guztien eskura egongo denez, Aranzadiko adituek egingo duten bisita gidatuan parte hartzera deitu dituzte herritarrak. Bisita ekainaren 2an izango da, 18:00etan, eta frontoiaren ondoan dagoen iturrian elkartuko dira. Parte hartzeko aurrez izena eman behar da tolosakoingurumenzentroa@gmail.com helbidera idatziz edo 688 727 983 telefono zenbakira deituz.