Munduari leiho bilakatutako koadroak, Aranburu jauregian

Duela hamar urte baino gehiago hasi zen, Tolosako kultur etxeko pintura ikastaroan, Ana Amigo. Bere hitzetan, «une hartan ez nuen uste esperientzia hura grina bilakatuko zenik, ezta beste batzuekin partekatzeko aukera emango zidanik ere». Hori dela eta, bere lanak etxean erakustea «pozgarria» da berarentzat. Ekainaren 12ra bitarte egongo dira ikusgai lan horiek, Aranburu jauregian; asteartetik larunbatera bisitatu daiteke erakusketa, 17:30etik 20:30era.

Oraingo honetarako, hainbat gai jorratzen dituzten lanen aukeraketa egin du Amigok. Horien artean, natura hilen adibide batzuk aurki daitezke. «Izan ere, zenbat bizitza ezkutatu daitezkeen horien atzean. Beste natura edo paisaia batzuentzako lekua ere badago. Tolosako Santa Klara kalea, Euskal Herria plazako azoka edo Zerkausia aurkituko dituzue, Donostiako portuarekin, Kursaalarekin eta Kontxako hondartzarekin batera».

Pintura, bidaiatzeko eta kultura berriak ezagutzeko modu bat bezala sentitzen duela azaldu du margolari tolosarrak. «Pinturarekin bidaiatzen dut, margotzen dudanean bidaiatzen dut, leku horretara joaten naiz, batzuetan nire oroimenean bakarrik edo guztion oroimenean dagoen leku horretara, herri eta gizarte gisa gordetzen dugun oroimen kolektibo horretan. Eta jakina, behatzaile gisa, ikusle gisa ere bidaiatzen dugu. Horrela, eta bizitzea egokitzen ari zaigun egun ilun samar hauetan, koadroak, inoiz baino gehiago, munduari leiho bilakatzen zaizkio».

Hain justu, leiho horiek mundu urrunetara eraman gaitzaketela nabarmendu du Amigok. «Horrela, gaztelar paisaiak eta paisaia afrikarrak aurkituko dituzue, baita giza paisaiak ere. Horiek baitira, beharbada, izaki bat bere baitan beti mundu bat dela dioten geografiarik sakonenak».