Aurtengo ekitaldia "zinez berezia" izango dela badakitela azaldu dute antolatzaileek, eta bere eskuetan dagoen guztia egingo dutela esan dute, "urtero moduan ahalik eta lasterketarik gogoangarriena" aurrera eramateko. "Ez dakigu, benetan ekainaren 13an zein egoera egongo den, baina argi daukaguna zera da, gure esku ez dagoen erabakiren bat izango dela aurtengo ekitaldia ez ospatzearen arrazoia", zehaztu dute.
Aldaketak egongo dira aurten, dortsalak jasotzean, irteeran, anoa postuetan, amaieran, kontsignan… eta guztiek "ahalik eta zorrotzen" bete beharko dutela araudia jakinarazi dute. Datozen asteetan informazio eta xehetasunak igortzen hasiko dira antolatzaileak: "Oso zorrotzak izango gara eta ez da bigarren aukerarik emango".
Bere mezua parte hartzaileei zuzenduz bukatu dute: "Ekainaren 13an ikusiko gara, zuek bitartean entrenatzeaz eta informazio eguneratua ondo ikasteaz arduratu, dortsalak jasotzerakoan hasiko baita aurtengo berrikuntzarik garrantzitsuenetariko bat".